ម៉ាឡេស៊ី៖ ប្រទេសម៉ាឡេស៊ី បានរាយការណ៍ករណីឆ្លងកូវីដ-១៩ថ្មីចំនួន ៨,៥៧៤នាក់សម្រាប់ថ្ងៃចន្ទ ទី១២ ខែកក្កដាម្សិលមិញនេះ ដែលនៅតែជាតួលេខខ្ពស់បំផុតបន្តទៀត ប៉ុន្តែមានការធ្លាក់ចុះបន្តិចបន្តួចបើប្រៀបនឹងថ្ងៃទី១០ ខែកក្កដាកន្លងទៅ ដែលមានអ្នកឆ្លងខ្ពស់ខ្លាំងដល់ទៅ ៩,៣៥៣នាក់។ ក្នុងករណីឆ្លងជាង ៨,៥០០ករណីនេះ ជាងពាក់កណ្តាលរកឃើញនៅតំបន់ Klang Valley ពោលគឺមានចំនួន ៤,៣០៨ករណីមាននៅតំបន់ Selangor និងចំនួន ៦០៩ករណីកើតមាននៅរាជធានីគូឡា ឡាំពួរ ដោយឡែកបណ្តារដ្ឋផ្សេងៗទៀតរួមមាន ៧៩៤ករណីនៅរដ្ឋ Negeri Sembilan, ៤១១ ករណីនៅរដ្ឋ Melaka និង ៤០៧ករណីនៅរដ្ធ Johor ជាប់នឹងប្រទេសសិង្ហបុរី។ 

អគ្គនាយកទទួលបន្ទុកផ្នែកសុខាភិបាលម៉ាឡេស៊ី លោក Noor Hisham Abdullah បានរាយការណ៍ករណីអ្នកស្លាប់ថ្មីចំនួន ១០២ ករណីនៅថ្ងៃចន្ទម្សិលមិញ ដោយអ្នកស្លាប់ទាំងនោះមានវ័យចាប់ពី ២៩ ទៅដល់ ៨៦ឆ្នាំ ដោយក្នុងនោះមានមនុស្សចំនួន ១៤នាក់បានស្លាប់ពេលយកមកដល់មន្ទីរពេទ្យ ដោយមិនទាន់បានទទួលការព្យាបាល។

ប្រទេសម៉ាឡេស៊ី បានឈានដល់ដំណាក់កាលបិទខ្ទប់ទូទាំងប្រទេសជាលើកទី៣ ចាប់តាំងពីថ្ងៃទី០១ ខែមិថុនាកន្លងមក ពោលគឺប៉ុន្មានថ្ងៃប៉ុណ្ណោះ ក្រោយពីប្រទេសនេះបានហក់ឡើងនូវចំនួនអ្នកឆ្លងកូវីដ-១៩ខ្ពស់បំផុតលើសពី ៩,០០០ករណីក្នុងមួយថ្ងៃកាលពីថ្ងៃទី២៩ ខែឧសភា។ 

គិតត្រឹមថ្ងៃចន្ទម្សិលមិញនេះ ម៉ាឡេស៊ីបានរាយការណ៍ករណីអ្នកឆ្លងកូវីដ-១៩ សរុបចំនួន ៨៤៤,៨៧០ករណី ដោយក្នុងនោះមានអ្នកកំពុងសម្រាកព្យាបាលក្នុងមន្ទីរពេទ្យចំនួន ៩១,២៧២ករណី ខណៈអ្នកស្លាប់សរុបមានចំនួន ៦,២៦០ករណី៕